Qirg‘iz harbiylarini Suriyaga yuborish masalasi Moskvadagi uchrashuvlarda muhokama etilmadi. Bu haqda Qirg‘iziston prezidenti Almazbek Atambayev ma’lum qildi, deya xabar beradi “Gazeta.ru”.
“Bu masala umuman ko‘tarilmadi. Hatto tor doiradagi uchrashuvlarda ham. Shuning uchun o‘zim ham hayron qoldim”, — dedi Almazbek Atambayev.
Qirg‘iziston prezidentiga ko‘ra, Suriyaga harbiylarni jo‘natish uchun Kollektiv xavfsizlik shartnomasi tashkilotiga (ODKB) a’zo barcha davlatlar qarori, BMT rezolyutsiyasi zarur, shundan keyingina mamlakat parlamenti hal etuvchi qarorni chiqaradi.
Eslatib o‘tamiz, Qozog‘iston tashqi ishlar vaziri Kayrat Abdurahmonov ham Ostona o‘z harbiy xizmatchilarini Suriyaga jo‘natish bo‘yicha muzokaralar olib bormayotganini ma’lum qilgandi.
Avvalroq Rossiya Davlat Dumasi mudofaa bo‘yicha qo‘mitasi rahbari Vladimir Shamanov Rossiya Qirg‘iziston va Qozog‘iston bilan Suriyaga harbiy qismlar yo‘llash borasida muzokaralar olib borayotganini aytgan edi.
Izoh (0)