Rossiyaning Kamchatka yarimorolida 8,7 balli kuchli zilzilaga qaramay, shifokorlar bemorni operatsiya qilishni davom ettirdi. Bu haqda “RBK” xabar berdi.
Shifokorlar zilzila payti onkologik dispanserda jarrohlik amaliyotini bajarayotgan bo‘lgan. Kamchatka sog‘liqni saqlash vaziri Oleg Melnikovga ko‘ra, ular “xotirjamlikni saqlab, oxirigacha bemorning yonida bo‘lgan”. Buni zilzila payti videoga tushib qolgan operatsiyadagi vaziyat ham tasdiqlaydi:
Ayni paytda bemorning ahvoli yaxshi, yer silkinishiga qaramay ishlagan shifokorlar mukofotlanadi. Kamchatkada zilzila 30-iyulga o‘tar kechasi yarimorol qirg‘oqlaridan 161 kilometr uzoqlikda sodir bo‘ldi. O‘choq 32 kilometr chuqurlikda joylashgan.
Rossiya Fanlar akademiyasi mutaxassislari dastlab unga 7,5 magnituda bergan, keyin esa 8,5 gacha va 8,7 gacha ko‘targan. Zilzila nafaqat Kamchatkada, balki Kuril orollarida ham sezilgan. Yer silkinishlari tufayli Yaponiya, Gavayi va AQSHda ham sunami xavfi e’lon qilingan. Aholidan qirg‘oqqa baland joyga chiqish buyurilgan.
Ma’lumot o‘rnida, 28-mart kuni Xitoyda tug‘ruq markazidagi hamshiralar yer silkinishi payti yangi tug‘ilgan chaqaloqlarni himoya qilgandi. Myanmada yuz bergan zilzila kuchi Xitoyning Yunnan provinsiyasigacha yetib kelgandi.
Izoh (0)