O‘zbekistonlik UFC jangchisi Bogdan Guskovning ehtimoliy raqiblari ma’lum bo‘ldi

O‘zbekistonlik UFC jangchisi Bogdan Guskovning navbatdagi ehtimoliy raqiblari nomi e’lon qilindi. Bu haqda UFC matbuot xizmati ma’lumot berdi.

Xabarga ko‘ra, Guskovga qarshi oktagonga chiqishi mumkin bo‘lgan sportchilar sifatida Volkan Ozdemir, Jamol Hill, Yan Blaxovich va Halil Rauntrening nomlari tilga olingan. Muzokaralar ijobiy yakunlansa, aynan shu jangchilardan biri o‘zbekistonlik aralash jang san’ati vakilining navbatdagi raqibiga aylanishi mumkin.

Ta’kidlash joizki, Bogdan bu nomlardan biri — Volkan Ozdemir bilan ilgari jang o‘tkazgan. U o‘zining UFC’dagi debyut jangida shveytsariyalik jangchiga qarshi oktagonga chiqib, imkoniyatni boy bergan edi. Hozirda Ozdemir yarim og‘ir vazn toifasida Guskovdan bir pog‘ona yuqorida, 9-o‘rinda joylashgan.

Ehtimoliy raqiblar orasida eng yuqori reytingga ega jangchi Halil Rauntre bo‘lib, u UFC reytingida 4-o‘rinda turibdi. Yan Blaxovich 5-o‘rinda, Jamol Hill esa 6-o‘rinni egallab turibdi.

Eslatib o‘tamiz, Bogdan Guskov 26-iyul kuni Abu-Dabi shahrida bo‘lib o‘tgan UFC on ABC 9 turniri doirasida rossiyalik Nikita Krilovga qarshi oktagonga chiqib, birinchi raunddayoq texnik nokaut evaziga g‘alaba qozongandi. Ushbu natijadan so‘ng Guskov UFC reytingida uch pog‘ona yuqorilab, 10-o‘rinni egallab turibdi.