Singapurlik sayyohlar uchun O‘zbekistonga to‘g‘ridan to‘g‘ri charter reyslar tashkil etiladi. Bu haqda “Dunyo” xabar berdi.
Keltirilishicha, Singapurning yetakchi turoperatorlaridan biri Chan Brothers Travel kompaniyasi joriy yilning dekabr oyida Singapurdan O‘zbekistonga to‘g‘ridan to‘g‘ri charter parvozlar yordamida mamlakatga yuzlab turistlarni olib kelishni rejalashtirmoqda.
O‘zbekistonga to‘qqiz kunlik tur doirasida Singapur va Osiyo-Tinch okeani mintaqasidagi boshqa mamlakatlardan kelgan sayyohlar Toshkent, Samarqand, Buxoro va Xiva kabi shaharlarga tashrif buyurib, O‘zbekiston tarixi va madaniyati, tabiati va meʼmoriy yodgorliklari, shuningdek, urf-odatlari, milliy taomlari bilan tanishadi.
Charter parvozlarni targ‘ibot qilish maqsadida Chan Brothers Travel O‘zbekistonga bag‘ishlangan maxsus marketing kampaniyasini yo‘lga qo‘yish, Singapurda o‘tkaziladigan turistik ko‘rgazmalarda O‘zbekiston turizm salohiyatiga bag‘ishlangan tadbirlarni uyushtirish, Singapurning xitoy va malay tillardagi ommabop radiostansiyalarning mashhur boshlovchilarining sayohatchilar bilan birga O‘zbekistonga yuborishni rejalashtirmoqda.
Qayd etilishicha, mazkur tashabbus Singapurdan O‘zbekistonga sayyohlar oqimini oshirishga xizmat qiladi va ikki davlat o‘rtasidagi turizm sohasidagi hamkorlikni yangi bosqichga olib chiqadi.
O‘zbekistan va Singapur munosabatlari
Diplomatik munosabatlar 1997-yil 8-martda o‘rnatilgan.
Singapurda O‘zbekistonning fahriy konsulligi mavjud.
O‘zbekiston Singapurda doimiy elchixona ochmagan, ammo mintaqaviy aloqalarni ko‘rib chiqmoqda.
2024-yilda Toshkentda O‘zbekiston–Singapur biznes forumi o‘tkazilgan bo‘lib, unda 500 million dollardan ortiq qiymatdagi loyihalar muhokama qilingan.
O‘zbekistonga 2025-yilning yanvar—aprel oylarida jami 3,1 mln nafar chet el fuqarosi turistik maqsadlarda tashrif buyurgan. Mazkur ko‘rsatkich o‘tgan yilning mos davri bilan solishtirilganda 987,9 ming nafarga yoki 46,4 foizga oshgan. Safar maqsadlari kesimida sayyohlar eng ko‘p qarindoshlarni yo‘qlash maqsadida tashrif buyurgan — 2,1 mln nafar.
Shuningdek, sayyohlik yo‘nalishida 434,4 ming nafar, xizmat yuzasidan 374,6 ming nafar xorij fuqarosi tashrif buyurgan. Shu bilan birga:
- tijorat — 152,1 ming nafar;
- davolanish — 33,3 ming nafar;
- o‘qish — 7,9 ming nafar.
O‘zbekistonga 2024-yilda jami 8,2 mln nafar chet el fuqarosi turistik maqsadlarda tashrif buyurgani haqida xabar berilgandi. 2025-yilning yanvar—fevral oylarida jami 1,3 mln nafar chet el fuqarolari turistik maqsadlarda O‘zbekistonga tashrif buyurgan.
Tashrifi oshib borayotgan sayyohlar
2024-yilning boshidan turistlar oqimi har oy salmoqli oshib bormoqda. Yevropa ittifoqi davlatlaridan 2024-yilning yanvar oyida 4 601 nafar fuqaro turistik maqsadda O‘zbekistonga tashrif buyurgan. Yanvar—mart oylarida jami 1 mln 519,3 ming nafar chet el fuqarolari turistik maqsadlarda kelgan.
5 oyda esa 2,8 milliondan ortiq chet el fuqarolari turistik maqsadda tashrif buyurgan. Shularning, 10,6 ming nafari AQSHdan kelgan. 6 oyga kelib esa 3,5 milliondan ortiq chet el fuqarolari turistik maqsadda tashrif buyurdi. 1-oktyabrgacha esa jami 5,7 mln nafar keldi.
O‘zbekiston Butunjahon sayyohlik tashkilotining Sayyohlarni himoya qilish xalqaro kodeksiga rasman qo‘shildi. Bu bilan mamlakat turizm sohasidagi xalqaro standartlarga va sayohatchilar huquqlarini himoya qilishga bo‘lgan sodiqligini yana bir bor tasdiqladi.
Izoh (0)