Amerikalik xonanda Jennifer Lopes joriy yil avgust oyida Moskvada bo‘lishi rejalashtirilgan konsertini so‘nggi daqiqalarda bekor qildi. Mash nashri xabar berishicha, bunga Rossiyaning xalqaro maydondagi siyosiy vaziyati va xonandaning obro‘siga putur yetish xavfi sabab bo‘lgan.
Konsert tashkilotchilari bundan uch oy avval Lopesning menejerlari bilan kelishuvga erishgan hamda shouning barcha tafsilotlarini muhokama qilgan edi. Konsert Moskvadagi eng yirik arenalardan birida o‘tishi kerak edi va chipta sotuvi ham boshlanish arafasida edi. On the Floor hit qo‘shig‘i muallifi ushbu konsertda kamida 1 million AQSH dollari ishlab olishi mumkin edi.
Ammo qo‘shiqchi konsert boshlanishiga bir necha kun qolganda qarorini o‘zgartirdi. Prodyuser Pavel Rudchenko buni quyidagicha izohladi:
“G‘arbda Rossiya bilan hamkorlik qilish masalasiga juda ehtiyotkorlik bilan yondashilmoqda. Mashhur san’atkorlar esa siyosatdan chetda emas, ular ham obro‘-e’tiborini hamda o‘z biznesini asrashga majbur. Trampning Rossiyaga va bu mamlakat bilan hamkorlik qilayotganlarga qarshi yangi sanksiyalar joriy qilish haqidagi qarori esa san’atkorlarni xavotirga soladi. Shu sababli ko‘pchilik bunday muammoli vaziyatlarga tushib qolishni istamaydi”, deydi Rudchenko.
Jennifer Lopes bu safar Moskvaga kela olmagan bo‘lsa-da, kelajakda Rossiyada konsert berish rejasidan butunlay voz kechmaganini bildirgan.
Avvalroq Jennifer Lopes o‘nlab mamlakatlarni qamrab oladigan Up All Night: Live in 2025 katta konsert turini eʼlon qilgani, ular orasida birinchi marta O‘zbekiston ham borligi haqida xabar berilgandi. Shou dasturi 7-avgust kuni Toshkentdagi “Bunyodkor” stadionida bo‘lib o‘tadi.
Jennifer Lopesning o‘nlab mamlakatlarni qamrab oladigan Up All Night: Live in 2025 katta konsert turi AQSH, Yevropa, Osiyo, jumladan, Qozog‘iston, Armaniston va O‘zbekistonda bo‘lib o‘tadi.
Ma’lumot uchun: Jennifer Lopes 1969-yil 24-iyul Nyu York shahrida dunyoga kelgan amerikalik aktrisa, qo‘shiqchi, raqqosa, modelyer, prodyuser va ishbilarmon ayol. U birinchi marta 1991-yilda In Living Color teleko‘rsatuvida Fly Girl raqqosasi sifatida mashhurlikka erishgan. U 1993-yilgacha aktrisalik faoliyatini boshlashga qaror qilgunga qadar jamoaning doimiy aʼzosi bo‘lib qolgan. Lopes o‘zining birinchi bosh rolini 1997-yilda qo‘shiqchi Selena haqidagi biografik filmda ijro etgan. Bu rol unga “Oltin globus” nominatsiyasini olib kelgan.
Izoh (0)