Surf Air amerika aviakompaniyasi 23-iyunda Londondan Ispaniyaning Ivisa shahriga o‘zining Yevropadagi birinchi reysini amalga oshiradi. Shuningdek, kompaniya Kann, Syurix, Jeneva va Milanga parvozlarni amalga oshiradi. Bu haqda Reuters’ga tayanib, “Kommersant” xabar bermoqda.
Surf Air o‘zining aviachiptalar uchun noodatiy to‘lov tizimi bilan mashhur. Yo‘lovchi alohida reys uchun to‘lamaydi, tashuvchi xizmatidan cheksiz foydalanish uchun obuna bo‘ladi. Yevropada oyiga taxminan 2,2 ming dollar bo‘lgan tarif amal qiladi.
Surf Air’ning Yevropa bo‘linmasi bosh direktori Saymon Telling-Smitning aytishicha, AQSh va Yevropadagi reyslar tufayli kompaniya 2017-yilda 100 million dollar ishlab olishni rejalashtirmoqda. Uning qayd etishicha, yevropa yo‘nalishi joriy yil oxirigacha tashuvchi biznesining beshdan bir qismini tashkil qilishi kerak.
Ta’kidlanishicha, 2013-yilda Kaliforniyada tashkil qilingan aviakompaniyaning hozirgi vaqtda uch mingta obunachi yo‘lovchisi bor. O‘z reyslarida kompaniya Embraer va Pilatus samolyotlaridan foydalanadi. AQShda kompaniyaning 12 ta Pilatus samolyoti bo‘lib, yana 43 ta shunday havo layneri sotib olish uchun buyurtma berilgan. Tashuvchining yaqinda xarid qilingan Embraer Phenom 300 reaktiv samolyoti Yevropaga reyslarni amalga oshirishda foydalaniladi.
Saymon Telling-Smitning ma’lum qilishicha, kompaniya o‘z obunachilariga aeroportga parvozdan 15 daqiqa oldin yetib kelish imkoniyatiini taqdim etadi.
Izoh (0)