Surf Air америка авиакомпанияси 23 июнда Лондондан Испаниянинг Ивиса шаҳрига ўзининг Европадаги биринчи рейсини амалга оширади. Шунингдек, компания Канн, Цюрих, Женева ва Миланга парвозларни амалга оширади. Бу ҳақда Reuters’га таяниб, «Коммерсантъ» хабар бермоқда.
Surf Air ўзининг авиачипталар учун ноодатий тўлов тизими билан машҳур. Йўловчи алоҳида рейс учун тўламайди, ташувчи хизматидан чексиз фойдаланиш учун обуна бўлади. Европада ойига тахминан 2,2 минг доллар бўлган тариф амал қилади.
Surf Air’нинг Европа бўлинмаси бош директори Саймон Тэллинг-Смитнинг айтишича, АҚШ ва Европадаги рейслар туфайли компания 2017 йилда 100 миллион доллар ишлаб олишни режалаштирмоқда. Унинг қайд этишича, европа йўналиши жорий йил охиригача ташувчи бизнесининг бешдан бир қисмини ташкил қилиши керак.
Таъкидланишича, 2013 йилда Калифорнияда ташкил қилинган авиакомпаниянинг ҳозирги вақтда уч мингта обуначи йўловчиси бор. Ўз рейсларида компания Embraer ва Pilatus самолётларидан фойдаланади. АҚШда компаниянинг 12 та Pilatus самолёти бўлиб, яна 43 та шундай ҳаво лайнери сотиб олиш учун буюртма берилган. Ташувчининг яқинда харид қилинган Embraer Phenom 300 реактив самолёти Европага рейсларни амалга оширишда фойдаланилади.
Саймон Тэллинг-Смитнинг маълум қилишича, компания ўз обуначиларига аэропортга парвоздан 15 дақиқа олдин етиб келиш имкониятиини тақдим этади.
Изоҳ (0)