Sovuq va o‘qotar qurollar bilan qurollangan uch nafar falastinlik Quddusning Eski shahrida Isroil chegara politsiya patruliga hujum qilgan va harbiy xizmatchilardan birini og‘ir jarohatlagan. Hujum uyushtirganlar voqea joyida otib tashlangan. Bu haqda Isroil politsiyasi matbuot xizmatiga tayanib, “TASS” xabar berdi.
“Eski shahardagi Damashq darvozasiga uyushtirilgan hujum oqibatida chegara politsiya xizmatining xodimiga pichoq bilan jarohat yetkazilgan, hozirda uning ahvoli og‘ir deya baholanmoqda”, — deya qo‘shimcha qildi matbuot xizmati.
Politsiya hujum uyushtirganlarning birida bo‘lgan “Karl Gustav” tizimidagi pistolet-pulemyot suratini e’lon qildi. Ushbu o‘qotar qurol Iordan daryosining g‘arbiy qirg‘og‘idagi yerosti ustaxonalarida tayyorlangan. Isroil OAVlarining ma’lumotlariga ko‘ra, pistolet-pulemyot hujum vaqtida pand bergan.
Falastin-Isroil zonasidagi ziddiyatli zo‘ravonliklarning ushbu to‘lqini 2015-yilning sentabrida boshlangan edi. Shu vaqtga qadar sovuq va o‘qotar qurollar, shuningdek, portlovchi moddalar va avtomobillardan foydalanilib bir necha yuz hujum amalga oshirilishi oqibatida 42 nafar isroillik va uch nafar xorijlik fuqaro halok bo‘ldi, 500 dan ortiq kishi jarohat oldi.
Izoh (0)