Janubiy Koreyaning SolBridge Xalqaro biznes universitetida ta’lim olayotgan o‘zbekistonlik Shoxruh Jabborov Chet elliklar o‘rtasida koreys tilida nutq so‘zlash xalqaro musobaqasining Seul shahrida bo‘lib o‘tgan final bosqichida birinchi o‘rinni qo‘lga kiritdi. “Daryo” muxbiri Shoxruh Jabborov bilan bog‘lanib, uning erishgan natijalariga qiziqdi.
2012-yilda Janubiy Koreyaning Daejeon shahridagi SolBridge Xalqaro biznes universitetining bakalavr bosqichiga imtiyozli qabul qilingan Shoxruh Jabborov hozirgi kunda mazkur muassasaning magistratura bosqichida to‘liq grant asosida ta’lim olmoqda.
Chet elliklar o‘rtasida koreys tilida nutq so‘zlash xalqaro musobaqasining birinchi turi aprel oyida bo‘lib o‘tgan. May oyida bo‘lib o‘tgan ikkinchi turga yo‘l olgan Shoxruh 45 ta mamlakatning 1416 nafar ishtirokchisi orasidan tanlab olingan 16 nafar finalchi qatorida finalga yo‘llanmasini qo‘lga kiritdi.
Final bosqichi 13-iyunda tashkil etilib, unda dunyoning 14 ta mamlakatidan kelgan 16 nafar ishtirokchi qatnashdi. Shoxruh Jabborov uch daqiqa ichida “Yangi tug‘ilayotgan Koreya” mavzusida ushbu davlatda bo‘lib o‘tgan siyosiy mojarolar va xalqning biroz tushkunlikka tushganligini, hamda ushbu jihatlarni qanday qilib qay darajada bosib o‘tilganligi va hozirda xalq yanada yaxshi kayfiyatda jo‘shqinlik bilan rivojlanishda davom etayotganini hakamlar hamda ishtirokchilarga koreys tilida to‘liq va chiroyli yoritib bergan.
Sahnada yutuqlar e’lon qilinayotganida, “faxrli birinchi o‘rin O‘zbekistondan kelgan talaba Shoxruh Jabborovga berildi”, deb aytilganda ich-ichimdan juda faxrlanib ketdim va shuncha sarflagan kuch va vaqtimga yarasha taqdirlanganimdan juda xursand bo‘ldim. Hozirda magistratura bosqichidagi bilimlarni yanada chuqur o‘rganib, kelajakda o‘rgangan til va bilimlarimni ishlatib, O‘zbekiston va Janubiy Koreya munosabatlarining yanada yuqori pog‘onalarga chiqishida o‘z hissamni qo‘shmoqchiman.Shoxruh Jabborov, SolBridge Xalqaro biznes universiteti talabasi
Izoh (0)