Жанубий Кореянинг SolBridge Халқаро бизнес университетида таълим олаётган ўзбекистонлик Шохруҳ Жабборов Чет элликлар ўртасида корейс тилида нутқ сўзлаш халқаро мусобақасининг Сеул шаҳрида бўлиб ўтган финал босқичида биринчи ўринни қўлга киритди. «Дарё» мухбири Шохруҳ Жабборов билан боғланиб, унинг эришган натижаларига қизиқди.
2012 йилда Жанубий Кореянинг Даэжеон шаҳридаги SolBridge Халқаро бизнес университетининг бакалавр босқичига имтиёзли қабул қилинган Шохруҳ Жабборов ҳозирги кунда мазкур муассасанинг магистратура босқичида тўлиқ грант асосида таълим олмоқда.
Чет элликлар ўртасида корейс тилида нутқ сўзлаш халқаро мусобақасининг биринчи тури апрель ойида бўлиб ўтган. Май ойида бўлиб ўтган иккинчи турга йўл олган Шохруҳ 45 та мамлакатнинг 1416 нафар иштирокчиси орасидан танлаб олинган 16 нафар финалчи қаторида финалга йўлланмасини қўлга киритди.
Финал босқичи 13 июнда ташкил этилиб, унда дунёнинг 14 та мамлакатидан келган 16 нафар иштирокчи қатнашди. Шохруҳ Жабборов уч дақиқа ичида «Янги туғилаётган Корея» мавзусида ушбу давлатда бўлиб ўтган сиёсий можаролар ва халқнинг бироз тушкунликка тушганлигини, ҳамда ушбу жиҳатларни қандай қилиб қай даражада босиб ўтилганлиги ва ҳозирда халқ янада яхши кайфиятда жўшқинлик билан ривожланишда давом этаётганини ҳакамлар ҳамда иштирокчиларга корейс тилида тўлиқ ва чиройли ёритиб берган.
Саҳнада ютуқлар эълон қилинаётганида, «фахрли биринчи ўрин Ўзбекистондан келган талаба Шохруҳ Жабборовга берилди», деб айтилганда ич-ичимдан жуда фахрланиб кетдим ва шунча сарфлаган куч ва вақтимга яраша тақдирланганимдан жуда хурсанд бўлдим. Ҳозирда магистратура босқичидаги билимларни янада чуқур ўрганиб, келажакда ўрганган тил ва билимларимни ишлатиб, Ўзбекистон ва Жанубий Корея муносабатларининг янада юқори поғоналарга чиқишида ўз ҳиссамни қўшмоқчиман.Шохруҳ Жабборов, SolBridge Халқаро бизнес университети талабаси
Изоҳ (0)