Qandim konlar guruhida gazni qayta ishlash zavodining birinchi navbati qurilishi dekabr oyida yakuniga yetadi. Bu haqda Xalqaro press-klub yig‘ilishida “O‘zbekneftgaz” xoldingi tarkibiga kiruvchi “Neftgazinvest” kompaniyasi direktori Bahodir Siddiqov ma’lum qildi, deya xabar beradi “Gazeta.uz”.
“Mazkur loyiha bo‘yicha rossiyalik hamkorlar — ‘Lukoyl’ kompaniyasi bilan loyihani amalga oshirishni tezlashtirish qarori qabul qilindi. Dastlab 2018- yilning iyuniga rejalashtirilgan birinchi bosqich 2017 yil dekabrida yakuniga yetadi”, — dedi kompaniya rahbari.
Bahodir Siddiqovga ko‘ra, hozir obyektga loyihada ko‘zda tutilgan 93 foiz uskunalar yetkazilgan. Zavod qurilishida 8 ming kishi band bo‘lib, ularning 90 foizi mahalliy mutaxassisdir.
2015-yil fevralida “Lukoyl” va Janubiy Koreyaning Hyundai Engineering kompaniyasi boshchiligidagi pudratchilar konsorsiumi Qandim GQIZ qurilishi va uni uskunalar bilan ta’minlash bo‘yicha 2,66 milliard dollarlik shartnomani imzolagan edi.
Ishlab chiqarish quvvati 8,1 milliard kub metr gaz bo‘lgan majmua qurilishi 2016-yil aprelida boshlandi. Mazkur loyihaning birinchi navbatiga kiritiluvchi sarmoyalarning umumiy hajmi 3,3 milliard dollarni tashkil etadi.
Izoh (0)