Samvel Babayandan chekinish: Eron bilan o‘yinoldi matbuot anjumanida Viktor Jalilov qatnashdi

Bugun — 12-iyun kuni futbol bo‘yicha O‘zbekiston milliy terma jamoasi Tehronda Eronga qarshi saf tortadi.

JCh—2018 saralashining 8-turidan o‘rin olgan uchrashuv oldidan kecha — 11-iyun kuni matbuot anjumani bo‘lib o‘tdi. Unda O‘zbekiston milliy terma jamoasi bosh murabbiyi Samvel Babayan emas, uning yordamchisi Viktor Jalilov ishtirok etdi. Unga “Qo‘qon-1912” safidagi o‘yinlari orqali termaga jalb qilingan Murod Xolmuhamedov hamrohlik qildi.

Guruhda hali hech narsa hal bo‘lmagan. Jamoalarning ikkitadan ortiq to‘p farqi bilan g‘alaba qozonmagani raqobat kuchli ekanidan dalolatdir.

Guruhimizda asosiy kurash Eron, Janubiy Koreya va O‘zbekiston o‘rtasida kechmoqda. Suriya, Xitoy va Qatar esa yaxshi o‘yin ko‘rsatib, yuqoridagi jamoalarga muammolar tug‘dirmoqda.

2012-yil Eronni o‘z maydonida yutganmiz, demak, har qanday jamoani mag‘lubiyatga uchratish mumkin. To‘g‘ri, Eron so‘nggi saralash bosqichida hali gol o‘tkazmadi, lekin bu futbol va unda hamma narsa bo‘lishi mumkin. Nima uchun biz Eronga gol urmasligimiz kerak? Buni uddalay olamiz deb o‘ylayman.

Viktor Jalilov, O‘zbekiston termasi murabbiyi

Toshkentda deyarli tengma-teng o‘yin guvohiga aylangandik. O‘zbekiston g‘alaba uchun maydonga tushgandi, biroq hakamlarning kutilmagan qarori tufayli standart vaziyat belgilangan va davrozamizdan to‘p olib chiqqandik.

Eron tarkibidan alohida bir o‘yinchini ajratmagan bo‘lardim. Raqib jamoaviy o‘yin namoyish qiladi. Aytishim mumkin bo‘lgani, himoya chizig‘i kuchli va tartibli o‘yin ko‘rsatadi.

Eron terma jamoasi va shaxsan Karlush Keyrushga tayyorlab qo‘ygan sovg‘amiz bor. Umid qilamanki, ertaga g‘alaba qozonib, Toshkentga 3 ochko bilan qaytamiz.

Murod Xolmuhamedov, O‘zbekiston termasi a’zosi