Самвел Бабаяндан чекиниш: Эрон билан ўйинолди матбуот анжуманида Виктор Жалилов қатнашди

Бугун — 12 июнь куни футбол бўйича Ўзбекистон миллий терма жамоаси Теҳронда Эронга қарши саф тортади.

ЖЧ—2018 саралашининг 8-туридан ўрин олган учрашув олдидан кеча — 11 июнь куни матбуот анжумани бўлиб ўтди. Унда Ўзбекистон миллий терма жамоаси бош мураббийи Самвел Бабаян эмас, унинг ёрдамчиси Виктор Жалилов иштирок этди. Унга «Қўқон-1912» сафидаги ўйинлари орқали термага жалб қилинган Мурод Холмуҳамедов ҳамроҳлик қилди.

Гуруҳда ҳали ҳеч нарса ҳал бўлмаган. Жамоаларнинг иккитадан ортиқ тўп фарқи билан ғалаба қозонмагани рақобат кучли эканидан далолатдир.

Гуруҳимизда асосий кураш Эрон, Жанубий Корея ва Ўзбекистон ўртасида кечмоқда. Сурия, Хитой ва Қатар эса яхши ўйин кўрсатиб, юқоридаги жамоаларга муаммолар туғдирмоқда.

2012 йил Эронни ўз майдонида ютганмиз, демак, ҳар қандай жамоани мағлубиятга учратиш мумкин. Тўғри, Эрон сўнгги саралаш босқичида ҳали гол ўтказмади, лекин бу футбол ва унда ҳамма нарса бўлиши мумкин. Нима учун биз Эронга гол урмаслигимиз керак? Буни уддалай оламиз деб ўйлайман.

Виктор Жалилов, Ўзбекистон термаси мураббийи

Тошкентда деярли тенгма-тенг ўйин гувоҳига айлангандик. Ўзбекистон ғалаба учун майдонга тушганди, бироқ ҳакамларнинг кутилмаган қарори туфайли стандарт вазият белгиланган ва даврозамиздан тўп олиб чиққандик.

Эрон таркибидан алоҳида бир ўйинчини ажратмаган бўлардим. Рақиб жамоавий ўйин намойиш қилади. Айтишим мумкин бўлгани, ҳимоя чизиғи кучли ва тартибли ўйин кўрсатади.

Эрон терма жамоаси ва шахсан Карлуш Кейрушга тайёрлаб қўйган совғамиз бор. Умид қиламанки, эртага ғалаба қозониб, Тошкентга 3 очко билан қайтамиз.

Мурод Холмуҳамедов, Ўзбекистон термаси аъзоси