Radioelektron vositalar va radiochastota spektrlaridan foydalanish monitoringi natijalariga ko‘ra, O‘zbekiston Aloqa, axborotlashtirish va telekommunikatsiya texnologiyalari sohasida nazorat bo‘yicha davlat inspeksiyasi Unitel MChJ (Beeline) va Coscom MChJ XK (Ucell) mobil aloqa operatorlari tomonidan so‘nggi vaqtlarda qo‘pol qoidabuzarliklarga yo‘l qo‘yilayotgani aniqlandi. Bu haqda inspeksiya rasmiy saytida xabar berildi.
Xususan, Unitel MChJ ham, Coscom MChJ XK ham Toshkent, Jizzax, Sirdaryo va Qashqadaryo viloyatlarida, shuningdek, Qoraqalpog‘iston Respublikasida ekspluatatsiyaga qabul qilib olish aktini rasmiylashtirmagan holda hamda radioelektron vositalar va radiochastotalardan texnik foydalanish uchun tegishli ruxsatnomalarsiz baza stansiyalari va radioreleli liniyalarni noqonuniy tarzda ishlatgan va ulardan tijorat maqsadlarida foydalangan.
Coscom MChJ XK va Unitel MChJ tomonidan ko‘chma radiotelefon aloqasi tarmog‘ini loyihalashtirish, qurish, foydalanish va xizmat ko‘rsatish faoliyati bilan shug‘ullanish huquqi uchun berilgan litsenziya shartlari, shuningdek, O‘zbekiston Respublikasi normativ-huquqiy hujjatlari talablari tizimli va qo‘pol tarzda buzilmoqda, deyiladi xabarda.
Inspeksiya tomonidan Coscom MChJ XK va Unitel MChJga O‘zbekiston Respublikasi normativ-huquqiy hujjatlari talablariga qat’iy rioya qilish va litsenziya shartnomasi shartlari bajarilishini ta’minlash bo‘yicha qayta ko‘rsatma berildi. Ular bajarilmagan taqdirda litsenziya amal qilishi borasida tegishli choralar ko‘rilishi haqida bildirish xati berildi.
Izoh (0)