“Toshkent-Aero” ixtisoslashtirilgan bojxona kompleksi tomonidan poytaxtdagi “Shofayzi”, “Vatan”, “Traktorsozlar”, “Shoshtepa”, “Afrosiyob”, “No‘g‘oy-qo‘rg‘on” kabi mahallalarda huquqbuzarliklar profilaktikasini amalga oshirishga qaratilgan qator uchrashuvlar tashkil etildi. Mazkur tadbirlarda mahalla faollari, profilaktika inspektorlari va keng jamoatchilik vakillari ishtirok etdi. Bu haqda kompleks axborot xizmati ma’lum qildi.
“Shofayzi” mahallasidagi yig‘ilishda so‘zga chiqar ekan, “Toshkent-Aero” ixtisoslashtirilgan bojxona kompleksi bojxona tekshiruvlari va surishtiruv bo‘limi boshlig‘i A.Jalilov huquqbuzarliklar profilaktikasi va jinoyatchilikka qarshi kurashish borasida amalga oshirilayotgan kompleks chora-tadbirlar mamlakatda huquq-tartibotni ta’minlashda ijobiy natijalarga erishish, kriminogen vaziyatni yanada yaxshilashga xizmat qilayotganini ta’kidladi.
“Shofayzi” mahallasida ham bojxona qoidabuzarliklarini sodir etib, javobgarlikka tortilgan shaxslar uchrab turibdi. Ulardan biri 32 yoshli Umidjon Sharifov (ismi-shariflar o‘zgartirilgan) bo‘lib, ushbu shaxs Moskvadan uchib kelar ekan, Islom Karimov nomidagi Toshkent xalqaro aeroportida bojxonachilar tomonidan to‘xtatib qolindi. Unga tegishli qo‘l telefoni o‘rnatilgan tartibda ko‘zdan kechirilganda, telefon xotirasida 26 dona behayo mazmundagi videolavha borligi aniqlandi.
Umidjon Sharifovga nisbatan Ma’muriy javobgarlik to‘g‘risidagi Kodeksining 189-moddasi bilan ma’muriy ish yuritilib, sud xukmiga binoan ushbu shaxs aybli deb topildi hamda eng kam oylik ish haqining 10 barobari miqdorida, ya’ni 1 497 750 so‘m jarima jazosi tayinlandi.
“Afrosiyob” mahallasida bo‘lib o‘tgan uchrashuvda esa tovar-moddiy boyliklarni bojxona chegaralari orqali noqonuniy olib o‘tilishiga chek qo‘yish borasida amalga oshirilayotgan chora-tadbirlar va bu boradagi mavjud tartiblar haqida axborot berildi.
Mazkur mahallada mahallada istiqomat qiluvchi X.Ahadova Bokuga parvozi oldidan Islom Karimov nomidagi Toshkent xalqaro aeroportida shaxsiy ko‘rikdan o‘tkazilganda bojxonachilar va xolislar qarshisida uyalib qoldi. U ichki a’zolariga yashirgancha qiymati 14,5 million so‘mlik 60 grammdan ortiq zargarlik buyumlarini yashirincha olib chiqishni rejalashtirgan ekan.
X. Ahadovaga sud xukmiga binoan eng kam oylik ish haqining 2 barobari miqdorida, ya’ni 299 550 so‘m jarima jazosi tayinlandi. Tilla taqinchoqlar esa belgilangan tartibda davlat egaligiga o‘tkazildi.
Izoh (0)