O‘zbekiston oliy va o‘rta maxsus ta’lim vazirligi kechki ta’lim shaklini qayta tiklash imkoniyatlarini o‘rganib chiqmoqda. Bu haqda Xalqaro press-klubning 7-iyun kuni bo‘lib o‘tgan anjumanida vazirlik rahbarining birinchi o‘rinbosari Inomjon Majidov ma’lum qildi.
Uning so‘zlariga ko‘ra, sirtqi ta’lim shakliga qabul 2004-yili, ta’lim sifati standartlarga javob berolmagani sababli to‘xtatib qo‘yilgan.
2017—2018-yilgi o‘quv yilida uch oliygoh — Toshkent temiryo‘l muhandislari instituti, Toshkent axborot texnologiyalari instituti va Navoiy davlat konchilik institutida sirtqi ta’lim shakli qayta tiklanadi.
Biroq boshqa OTMlarni ham sirtqi ta’lim bilan qamrab olish yo‘lida ma’lum bir to‘siqlar bor.“Sirtqi ta’limni kengaytirish — oson ish emas. Bizning hozirgi sharoitimizda sirtqi yo‘nalishdagi ta’lim sifati jiddiy zarar ko‘radi. Biz sirtqi ta’limni zarur metodologiya, metodika, texnika bo‘lganidagina tatbiq etishimiz mumkin”, — dedi vazirning birinchi o‘rinbosari.
Inomjon Majidovning qo‘shimcha qilishicha, kechki ta’lim shakli sirtqi ta’limdan ko‘ra “jozibaliroq ko‘rinadi”, biroq hozircha uni faqat poytaxtdagi oliygohlarda tatbiq etish mumkin.
“Kechki ta’lim shaklida talaba, ehtimol, to‘rt yil emas, balki besh yo olti yil o‘qir. Mazkur masala hozirda muhokama jarayonida, biz jahon amaliyotini o‘rganib chiqmoqdamiz”, — deya qo‘shimcha qildi Majidov.
Izoh (0)