Ўзбекистон олий ва ўрта махсус таълим вазирлиги кечки таълим шаклини қайта тиклаш имкониятларини ўрганиб чиқмоқда. Бу ҳақда Халқаро пресс-клубнинг 7 июнь куни бўлиб ўтган анжуманида вазирлик раҳбарининг биринчи ўринбосари Иномжон Мажидов маълум қилди.
Унинг сўзларига кўра, сиртқи таълим шаклига қабул 2004 йили, таълим сифати стандартларга жавоб беролмагани сабабли тўхтатиб қўйилган.
2017—2018 йилги ўқув йилида уч олийгоҳ — Тошкент темирйўл муҳандислари институти, Тошкент ахборот технологиялари институти ва Навоий давлат кончилик институтида сиртқи таълим шакли қайта тикланади.
Бироқ бошқа ОТМларни ҳам сиртқи таълим билан қамраб олиш йўлида маълум бир тўсиқлар бор.«Сиртқи таълимни кенгайтириш — осон иш эмас. Бизнинг ҳозирги шароитимизда сиртқи йўналишдаги таълим сифати жиддий зарар кўради. Биз сиртқи таълимни зарур методология, методика, техника бўлганидагина татбиқ этишимиз мумкин», — деди вазирнинг биринчи ўринбосари.
Иномжон Мажидовнинг қўшимча қилишича, кечки таълим шакли сиртқи таълимдан кўра «жозибалироқ кўринади», бироқ ҳозирча уни фақат пойтахтдаги олийгоҳларда татбиқ этиш мумкин.
«Кечки таълим шаклида талаба, эҳтимол, тўрт йил эмас, балки беш ё олти йил ўқир. Мазкур масала ҳозирда муҳокама жараёнида, биз жаҳон амалиётини ўрганиб чиқмоқдамиз», — дея қўшимча қилди Мажидов.
Изоҳ (0)