Abu-Dabida 69 yoshli falastinlik Muhammad Mahmud Nazmiy 22 yildan buyon o‘g‘lining xotirasiga Ramazon oyida savob ishlarni amalga oshirib kelmoqda, deb yozadi Gulf News.
Uning o‘g‘li Haysam Nazmiy 1996-yilda 18 yoshida avtomobilda halokatga uchrab olamdan ko‘z yumgan. O‘sha yili Ramazon oyida u Abu-Dabidagi uyi yaqinida 300 ga yaqin kishi uchun bepul iftorliklar tashkil qilgan va o‘shandan buyon bu an’anani davom ettirib kelmoqda.
Odatda kechki payt soat oltilarda ko‘ngillilar kelib, Mahmudga iftorlik tayyorlashda yordam beradi. Mahmud restorandan taom keltirib, u bilan birga xurmo, suv, sharbat tarqatadi. Uning aytishicha, u kuniga taxminan 2000 dirham pul sarflaydi.
Mahmud Tashqi ishlar vazirligining iste’fodagi xodimidir. Uni bir qizi va uch o‘g‘li ham qo‘llab-quvvatlaydi.
Izoh (0)