AQShning Florida shtati politsiyasi bir yashar qizini ilon chaqishiga yo‘l qo‘yib bergan ayolning ishini tekshirmoqda, deb yozadi “Vesti.ru”. Ism-sharifi oshkor etilmayotgan ayolning aytishicha, u buni tarbiya maqsadlarida qilgan. “Dars” videosini u Facebook‘dagi sahifasiga joyladi.
Kadrlarda kichik ilon (chipor ilon) o‘ziga qo‘l cho‘zayotgan qizchani tishlab olganini ko‘rish mumkin. Qizcha yig‘lashni boshlagan, voqeani videoga olayotgan ona esa kulgan. Noroziliklar yog‘ilgach, ayol ushbu rolikni Facebook‘dan o‘chirib tashladi.
Jurnalistlarga bergan intervyusida ayol tomoshabinlar “o‘ta ko‘ngilchan” ekanligini aytdi. “Bu ilon meni va o‘g‘limni bir necha marta tishlagan. U umuman bezarar. Uning tishlari shunchalik maydaki, u chaqaloqning terisini ham tishlab ololmaydi. Qizim og‘riqdan emas, qo‘rqqanidan yig‘lab yubordi”, — dedi u.
“Endi qizim ilonlarga qo‘l tekkizmaydi. U ulardan qo‘rqmaydi, lekin ularga tegmaydi ham — maqsadim ham shu edi. Hech qachon o‘z farzandimga ataylabdan zarar yetkazmagan bo‘lardim”, — deya qo‘shib qo‘ydi ayol.
Hozircha ayolga nisbatan jinoiy ish qo‘zg‘atilgani yo‘q.
Izoh (0)