Tramp terrorizm ustidan g‘alaba qozonishga va’da berdi

AQSh prezidenti Donald Tramp amerikalik harbiy xizmatchilarning Italiyadagi Sigonelle bazasida qilgan chiqishi chog‘ida terrorizmni tag tomiri bilan yo‘q qilishga yana bir bor va’da berdi. Bu haqda “TASS” xabar bermoqda.

“Terrorizm — bu tahdid, katta tahdid. Biroq biz g‘alaba qilamiz”, — dedi Tramp.

Bungacha Tramp “Katta yettilik” mamlakatlari sammitida qatnashgan edi. Uning so‘zlariga ko‘ra, u va Amerika delegatsiyasi mazkur tadbir davomida “ko‘plab yaxshi do‘stlar orttirishga” muvaffaq bo‘lgan.

Bundan tashqari, AQSh rahbari o‘zining Saudiya Arabistoniga tashrifini ham yodga olib, arab mamlakatlari yetakchilari bilan terrorchilikka qarshi kurashni muhokama qilganini eslatib o‘tdi.

“Biz terrorchilikni moliyalashtiruvchi kanallarni yo‘q qilishga mas’ul bo‘lgan ishchi guruhini tashkil etdik”, — deya ma’lum qildi AQSh prezidenti.

“Biz, shuningdek, Eron tuzumini uning dushmanona va barqarorlikka tahdid soluvchi faolligini ham cheklaymiz. Eron hech qanaqasiga yadroviy qurolga ega bo‘lmasligi lozimligini biz tasdiqladik”, — dedi Tramp.