O‘zbekiston mehnat vazirligi Bandlik va mehnat munosabatlari vazirligiga aylantirildi. Bu Prezidentning 23-maydagi “Bandlik sohasida davlat siyosatini yanada takomillashtirish va mehnat organlari faoliyati samaradorligini tubdan oshirish chora-tadbirlari to‘g‘risida”gi farmonida nazarda tutilgan, deb xabar beradi “Gazeta.uz”.
Hujjat bandlik sohasidagi davlat siyosatini amalga oshirishda yangi yondashuvlarni joriy etish, mehnat bozori infrastrukturasini davlat va xususiy mulk hamkorligi asosida rivojlantirish, aholi, ayniqsa yoshlar bandligini ta’minlashda samarador chora-tadbirlarni amalga oshirishga yo‘naltirilgan.
Yangi tashkil etilgan vazirlikning asosiy vazifalari yangi ish o‘rinlarini yaratish bo‘yicha davlat buyurtmasi ustida ishlash, aholi bandligi bo‘yicha mintaqaviy va tarmoq dasturlari realizatsiyasini muvofiqlashtirish, oliy va o‘rta maxsus, kasb-hunar ta’limi muassasalari bitiruvchilarini ishga joylashni ta’minlash chora-tadbirlarini amalga oshirish, kam ta’minlangan oilalarga o‘z vaqtida nafaqa va moddiy yordamning to‘lab borilishini monitoring qilish va boshqalardir.
Shuningdek, farmonda mehnat qonunchiligini takomillashtirish hamda shu yo‘l bilan aholi bandligini ta’minlashni yaxshilash bo‘yicha qator choralar nazarda tutilgan. Jumladan, 2018-yilning 1-yanvaridan ilk bora ishga joylashgan kollej, litsey va oliygohlar bitiruvchilarining mehnati daromadi uchun birinchi mehnat yili davomida yagona sotsial to‘lov stavkasi 50 foizga, ikkinchi va uchinchi yillarda esa 25 foizga qisqartiriladi,
Shuningdek, o‘sha sanadan boshlab nodavlat tashkilotlarga pulli asosda O‘zbekiston hududida fuqarolarni ish bilan ta’minlash bo‘yicha xizmatlar ko‘rsatish huquqi taqdim etiladi. Ularni chet elda ish bilan ta’minlashda esa litsenziya asosida xizmat ko‘rsatishga ruxsat etiladi.
Vazirlik huzurida jamoat ishlari jamg‘armasi tashkil etiladi. Uning asosiy vazifalari — vaqtinchalik ishsiz aholining yirik investitsion loyihalarda, yo‘l va uy-joy va kommunal infrastruktura qurilishida, ta’mirida va rekonstruksiyasida, shahar va tumanlarni obodonlashtirishda, mavsumiy qishloq xo‘jaligi ishlarida ishtirok etishini ta’minlash.
2017–2020-yillarda boshlang‘ich tadbirkorlar uchun mikromoliyaviy xizmatlar ko‘rsatish hajmlarini va nuqtalarini kengaytirish, aholi bandligini ta’minlashda bank tizimining o‘rnini keskin oshirish ko‘zda tutilgan.
Nihoyat, mehnat va aholi bandligini ta’minlash organlari faoliyatini yaxshilash bo‘yicha kompleks chora-tadbirlar dasturi tasdiqlandi.
Izoh (0)