Ўзбекистон меҳнат вазирлиги Бандлик ва меҳнат муносабатлари вазирлигига айлантирилди. Бу Президентнинг 23 майдаги «Бандлик соҳасида давлат сиёсатини янада такомиллаштириш ва меҳнат органлари фаолияти самарадорлигини тубдан ошириш чора-тадбирлари тўғрисида»ги фармонида назарда тутилган, деб хабар беради «Газета.uz».
Ҳужжат бандлик соҳасидаги давлат сиёсатини амалга оширишда янги ёндашувларни жорий этиш, меҳнат бозори инфраструктурасини давлат ва хусусий мулк ҳамкорлиги асосида ривожлантириш, аҳоли, айниқса ёшлар бандлигини таъминлашда самарадор чора-тадбирларни амалга оширишга йўналтирилган.
Янги ташкил этилган вазирликнинг асосий вазифалари янги иш ўринларини яратиш бўйича давлат буюртмаси устида ишлаш, аҳоли бандлиги бўйича минтақавий ва тармоқ дастурлари реализациясини мувофиқлаштириш, олий ва ўрта махсус, касб-ҳунар таълими муассасалари битирувчиларини ишга жойлашни таъминлаш чора-тадбирларини амалга ошириш, кам таъминланган оилаларга ўз вақтида нафақа ва моддий ёрдамнинг тўлаб борилишини мониторинг қилиш ва бошқалардир.
Шунингдек, фармонда меҳнат қонунчилигини такомиллаштириш ҳамда шу йўл билан аҳоли бандлигини таъминлашни яхшилаш бўйича қатор чоралар назарда тутилган. Жумладан, 2018 йилнинг 1 январидан илк бора ишга жойлашган коллеж, лицей ва олийгоҳлар битирувчиларининг меҳнати даромади учун биринчи меҳнат йили давомида ягона социал тўлов ставкаси 50 фоизга, иккинчи ва учинчи йилларда эса 25 фоизга қисқартирилади,
Шунингдек, ўша санадан бошлаб нодавлат ташкилотларга пулли асосда Ўзбекистон ҳудудида фуқароларни иш билан таъминлаш бўйича хизматлар кўрсатиш ҳуқуқи тақдим этилади. Уларни чет элда иш билан таъминлашда эса лицензия асосида хизмат кўрсатишга рухсат этилади.
Вазирлик ҳузурида жамоат ишлари жамғармаси ташкил этилади. Унинг асосий вазифалари — вақтинчалик ишсиз аҳолининг йирик инвестицион лойиҳаларда, йўл ва уй-жой ва коммунал инфраструктура қурилишида, таъмирида ва реконструкциясида, шаҳар ва туманларни ободонлаштиришда, мавсумий қишлоқ хўжалиги ишларида иштирок этишини таъминлаш.
2017–2020 йилларда бошланғич тадбиркорлар учун микромолиявий хизматлар кўрсатиш ҳажмларини ва нуқталарини кенгайтириш, аҳоли бандлигини таъминлашда банк тизимининг ўрнини кескин ошириш кўзда тутилган.
Ниҳоят, меҳнат ва аҳоли бандлигини таъминлаш органлари фаолиятини яхшилаш бўйича комплекс чора-тадбирлар дастури тасдиқланди.
Изоҳ (0)