Olmaliq kon-metallurgiya kombinati “Dalneye” konini o‘zlashtirishga kirishdi, deb xabar qildi korxona matbuot xizmati.
“Gazeta.uz”ning yozishicha, mazkur kon bazasida OKMK ishlab chiqarish quvvatini kengaytirish to‘g‘risidagi qaror 1-mart kuni O‘zbekiston Prezidenti Shavkat Mirziyoyev tomonidan imzolangan edi.
2017—2028-yillarga mo‘ljallangan loyihaga ko‘ra, yangi metallurgiya majmuasi qurilib, xalqaro standartlar asosida energiya samaradorligi va ekologik me’yorlarga mos keluvchi uskunalar bilan jihozlanadi.
Birinchi bosqichda (2017—2021-yillar) “Markaziy” karyerini o‘zlashtirish, foydali qazilmalar yuzini ochish va tog‘-kapital ishlar, ishlab chiqarish, transport, energetika obyektlari va boshqa yordamchi infratuzilmalar qurilishi, shuningdek, tog‘, transport va boshqa texnikalarni xarid qilish belgilangan.
Ikkinchi bosqichda (2019—2028-yillar) foydali qazilmalar yuzini ochish va tog‘-kapital ishlarni davom ettirish bilan bir qatorda, majmuaning yiliga 23 million tonna rudani qayta ishlash quvvatiga ega qayta ishlash, eritish, hamroh va yordamchi obyektlarini qurish ko‘zda tutilgan.
O‘zbekistonning 2017-yilgi Investitsiya dasturiga ko‘ra, qiymati 1,7 milliard dollarga yaqin bo‘lgan loyiha O‘zbekiston tiklanish va taraqqiyot jamg‘armasi, tijorat banklari kreditlari va OKMK mablag‘lari hisobidan amalga oshiriladi.
Konni o‘zlashtirish doirasida aprel oyi boshida Rossiyaning “RIVS” IIChB va OKMK o‘rtasida mis-boyitish majmuasi qurilishi bo‘yicha 500 million dollarlik shartnoma imzolangan edi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)