O‘zbekiston Prezidenti Shavkat Mirziyoyev rahbarligida shu yil 11-aprel kuni kengaytirilgan videoselektor yig‘ilish bo‘lib o‘tdi. Bu haqda O‘zA xabar bermoqda.
Selektor yig‘ilishida mamlakat oziq-ovqat xavfsizligini mustahkamlash borasidagi dolzarb vazifalar muhokama qilindi.
Ba’zi mintaqalarda yaratilayotgan sharoit va imkoniyatlarga qaramasdan, ayrim qishloq xo‘jaligi mahsulotlari bilan o‘z aholisini to‘liq ta’minlashga erishilmagan. Masalan, Qashqadaryo viloyatida mahalliy aholini hududda yetishtirilgan meva bilan ta’minlash darajasi 71 foizni, Sirdaryo viloyatida 85 foizni tashkil etmoqda.
Yig‘ilishda bu boradagi mavjud muammolarni hal etish yo‘llaridan biri — bu aholining tomorqa yerlaridan samarali foydalanishi bilan uzviy bog‘liq ekani ta’kidlandi. “Afsuski, bu boradagi ahvol hamma joyda ham talab darajasida, deb bo‘lmaydi”, — deb yozadi O‘zA.
Masalan, joriy yil davomida o‘tkazilgan o‘rganishlar shuni ko‘rsatdiki, Navoiy viloyatida 27 foiz, Samarqand viloyatida 45 foiz, Buxoro viloyatida 47 foiz, Jizzax viloyatida 50 foiz tomorqa yerlarida, afsuski, oziq-ovqat ekinlari va mevali daraxtlar ekilmagan.
Ana shu masalalarni hal qilish yuzasidan Qishloq va suv xo‘jaligi vazirligi va hokimliklar rahbarlariga oziq-ovqat xavfsizligini mustahkamlash va eksport hajmini ko‘paytirish uchun bir qator chora-tadbirlarni amalga oshirish vazifasi topshirildi.
Jumladan, meva-sabzavotchilikka ixtisoslashtirilgan 66 tumandagi 455 ming gektar unumdor yerdan, 2017—2020-yillarda paxta va g‘alladan bo‘shaydigan 215 ming gektar maydondan unumli foydalanish zarurligiga urg‘u berildi.
Shuningdek, O‘zbekistondagi 4 million 600 ming xonadonga tegishli 515 ming gektar tomorqa yerlariga joriy yilning 1-mayiga qadar oziq-ovqat ekinlarini to‘liq ekishni ta’minlash lozimligiga alohida e’tibor qaratildi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)