Fransiya prezidentligiga da’vogar Marin Le Pen mamlakatni NATOdan chiqarishga va’da berdi

Fransiya prezidenti lavozimiga da’vogarlik qilayotgan Xalq fronti partiyasi yetakchisi Marin Le Pen o‘zining saylovoldi kampaniyasi dasturida mamlakatning NATOdan chiqishi va o‘z qurolli kuchlarini kuchaytirishini birlamchi yo‘nalishlar sifatida belgiladi, deb yozadi “Korrespondent.net”.

Fransiya mamlakat manfaatlariga javob bermaydigan urushlarga o‘ralashib qolmasligi uchun, NATO harbiy qo‘mondonligini tark etishi kerak”, — deyiladi dasturda.

Le Pen, shuningdek, milliy chegaralarning qayta tiklanishi, Shengen zonasidan chiqish, mamlakatning Yevroittifoqdan chiqishi bo‘yicha referendum tashkil qilish va Fransiyaga noqonuniy tarzda kelganlarni fuqarolikka qabul qilishni taqiqlashni yoqlab chiqmoqda.

Siyosatchi Fransiyaning harbiy-sanoat kompleksini to‘liq hajmda qayta tiklash, harbiy byudjetni yalpi ichki mahsulotning 3 foizi darajasigacha ko‘paytirish va mamlakatning yadroviy qayta qurollanishini ishga tushirish, shuningdek, konstitutsiyani qayta ko‘rib chiqishga va’da bermoqda.

Le Penning dasturida jami 144 ta saylovoldi va’dalari bor.