30-yanvar kuni Viber’ga egalik qiluvchi Rakuten kompaniyasi bosh direktori Hirosi Mikitani messenjerda yaqin vaqt ichida AQShdan Donald Trampning qaroriga asosan fuqarolari Amerikaga kirishi taqiqlangan yettita musulmon davlatiga bepul xalqaro qo‘ng‘iroqlarni amalga oshirish imkoniyati paydo bo‘lishi haqida e’lon qildi. Yangi imkoniyat uy va mobil telefonlarga taalluqli. Bu haqda TJournal xabar berdi.
Mikitani o‘z tvitlarida hozir AQShda sodir bo‘layotgan voqealar uning uchun juda qayg‘uli ekanligini aytib o‘tdi, chunki u Yaponiyadan AQShga yetti yoshida kelgan va magistrlik darajasini Garvard universitetida olgan. U “Amerikaning katta yuragini” juda hurmat qilishini ta’kidlab o‘tdi.
Biroq, Mikitanining so‘zlariga ko‘ra, Trampning qaroridan so‘ng odamlar o‘z dini va millati tufayli tahqirlana boshladi. U kompaniya o‘zining musulmon xodimlarini qo‘llab-quvvatlashini qayd etdi.
Oxirgi xabarlaridan birida Rakuten rahbari Viber’da AQShdan Iroq, Eron, Suriya, Somali, Yaman, Liviya va Sudanga bepul xalqaro qo‘ng‘iroqlar paydo bo‘lishini aytdi. Dasturning rasmiy Twitter akkauntida yangi imkoniyat yaqin vaqt ichida paydo bo‘lishi xabar berilgan.
27-yanvar kuni AQSh prezidenti Donald Tramp yettita yirik musulmon davlati fuqarolariga mamlakatga uch oy davomida kirishni taqiqlovchi qarorni imzolagan edi. Bunda cheklov vizaga ega bo‘lgan fuqarolar uchun ham amal qiladi. Trampning o‘zi bu qarorni terrorizm bilan kurash sifatida izohladi.
Mikitani qarorga qarshilik bildirgan birinchi yirik kompaniya rahbari emas. 30-yanvar kuni Starbucks bosh direktori Govard Shults o‘zining dunyoning 75 ta mamlakatida kelgusi besh yil ichida 10 ming qochoqni ish bilan ta’minlash haqidagi rejasini e’lon qildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)