30 январь куни Viber’га эгалик қилувчи Rakuten компанияси бош директори Ҳироси Микитани мессенжерда яқин вақт ичида АҚШдан Дональд Трампнинг қарорига асосан фуқаролари Америкага кириши тақиқланган еттита мусулмон давлатига бепул халқаро қўнғироқларни амалга ошириш имконияти пайдо бўлиши ҳақида эълон қилди. Янги имконият уй ва мобил телефонларга тааллуқли. Бу ҳақда TJournal хабар берди.
Микитани ўз твитларида ҳозир АҚШда содир бўлаётган воқеалар унинг учун жуда қайғули эканлигини айтиб ўтди, чунки у Япониядан АҚШга етти ёшида келган ва магистрлик даражасини Гарвард университетида олган. У «Американинг катта юрагини» жуда ҳурмат қилишини таъкидлаб ўтди.
Бироқ, Микитанининг сўзларига кўра, Трампнинг қароридан сўнг одамлар ўз дини ва миллати туфайли таҳқирлана бошлади. У компания ўзининг мусулмон ходимларини қўллаб-қувватлашини қайд этди.
Охирги хабарларидан бирида Rakuten раҳбари Viber’да АҚШдан Ироқ, Эрон, Сурия, Сомали, Яман, Ливия ва Суданга бепул халқаро қўнғироқлар пайдо бўлишини айтди. Дастурнинг расмий Twitter аккаунтида янги имконият яқин вақт ичида пайдо бўлиши хабар берилган.
27 январь куни АҚШ президенти Дональд Трамп еттита йирик мусулмон давлати фуқароларига мамлакатга уч ой давомида киришни тақиқловчи қарорни имзолаган эди. Бунда чеклов визага эга бўлган фуқаролар учун ҳам амал қилади. Трампнинг ўзи бу қарорни терроризм билан кураш сифатида изоҳлади.
Микитани қарорга қаршилик билдирган биринчи йирик компания раҳбари эмас. 30 январь куни Starbucks бош директори Говард Шульц ўзининг дунёнинг 75 та мамлакатида келгуси беш йил ичида 10 минг қочоқни иш билан таъминлаш ҳақидаги режасини эълон қилди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)