Nigeriyada, turli ma’lumotlarga ko‘ra, 86 dan 130 nafargacha xotini bo‘lgan 93 yoshli Muhammad Bello Abubakr vafot etdi, deb yozadi Daily Trust.
29-yanvar, yakshanba kuni ko‘p xotinliligi bilan tanilgan Belloni Nigeriyaning markaziy qismida joylashgan Bida shahrida dafn etishdi.
2008-yilda Belloning 86 nafar xotini bo‘lgan, ammo o‘shandan buyon ularning soni 130 nafarga yetgan. Biroq Vanguard nashri uning 90 dan ortiq rafiqasi bo‘lganini aytayotgan bo‘lsa, Independent ma’lumotlariga ko‘ra, umri davomida u 107 marta uylangan va o‘n marta ajrashgan.
Ma’lumotlarga ko‘ra, Belloning 203 nafar farzandi bor, tez orada ularning soni ortishi mumkin: uning ba’zi xotinlari homilador.
2008-yilda Muhammad Bello Abubakr musulmonlarga ko‘pi bilan to‘rt xotinli bo‘lishga ruxsat beruvchi shariat qonunlarini buzganligi uchun hibsga olingan edi. Keyinroq undan ayblovlar olib tashlandi va u ozod etildi.
Izoh (0)