Tramp IShIDga qarshi kurash bo‘yicha yangi rejani ishlab chiqishga bir oy muhlat berdi

AQSh prezidenti Donald Tramp IShIDga qarshi kurashga bag‘ishlangan memorandumni imzoladi. Bu haqda Meduza xabar bermoqda.

Hujjat Pentagonga 30 kun muddat ichida IShIDga qarshi kurash bo‘yicha “yangi reja” qoralamasini prezidentga taqdim etish majburiyatini yuklaydi.

Rejada, jumladan, IShIDga qarshi kurash bo‘yicha koalitsiyaga kirishi mumkin bo‘lgan “yangi hamkorlar” ko‘rsatilishi, shuningdek, hamkorlarni qo‘llab-quvvatlash bo‘yicha choralar ko‘zda tutilishi kerak.

Bundan tashqari, rejada diniy aqidaparastlikni fosh etish va terrorchilarni moliyalashtirish yo‘llarini yo‘q qilish bo‘yicha choralar ham ko‘rsatilishi kerak.

IShID jangarilari hozirgi vaqtda Iroq va Suriyaning katta hududlarini o‘z nazorati ostida ushlab turibdi.

AQSh 2014-yildan beri xalqaro koalitsiya doirasida IShIDga qarshi kurash olib bormoqda. Koalitsiyadan o‘nlab mamlakatlar, xususan, AQShning NATO bo‘yicha hamkorlari va arab mamlakatlari o‘rin olgan. AQSh Iroq hukumati bilan hamkorlik qilmoqda; Suriya esa koalitsiyaning uning hududidagi harakatlarini suverenitetning buzilishi, deb hisoblaydi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.