Nyu-Yorkda musulmonlarning AQShga kirishiga qo‘yilgan taqiqqa qarshi yana bir aksiya bo‘lib o‘tmoqda

AQSh prezidenti Donald Tramp tomonidan mamlakatga qochoqlar va muhojirlar kirishi uchun kiritilgan cheklovlar munosabati bilan Bruklindagi federal sud qarshisidagi maydon norozilik harakatlarining yangi o‘chog‘iga aylandi, deb yozadi “RIA Novosti”. Ushbu sud avvalroq prezidentning yangi farmoni ta’sir doirasiga tushadigan kishilarni deportatsiya qilishni vaqtinchalik taqiqlagan edi.

Sud binosi yaqiniga to‘plangan yuzlab odamlar qabul qilingan qarorni katta g‘alaba deb atamoqda. Aksiyaning ko‘plab ishtirokchilari “Qochoqlar, xush kelibsiz” va “Barchamiz muhojirmiz” yozuvlari tushirilgan plakatlarni ko‘tarib olgan. Shunday shiorlar ijtimoiy tarmoqlarda ommabop xeshteglarga aylanib ulgurdi.

Shuningdek, Nyu-Yorkdagi Jon Kennedi nomli aeroport terminallari qarshisida AQSh yangi prezidentining immigratsiya siyosatiga qarshi norozilik aksiyalari bo‘lib o‘tmoqda. Bruklin federal sudining qarori haqidagi yangilik namoyishchilar tomonidan quvonch bilan kutib olindi, xaloyiq “Ozodlik!” va “Adolat!” deya hayqirdi.