Трамп ИШИДга қарши кураш бўйича янги режани ишлаб чиқишга бир ой муҳлат берди

АҚШ президенти Дональд Трамп ИШИДга қарши курашга бағишланган меморандумни имзолади. Бу ҳақда Meduza хабар бермоқда.

Ҳужжат Пентагонга 30 кун муддат ичида ИШИДга қарши кураш бўйича «янги режа» қораламасини президентга тақдим этиш мажбуриятини юклайди.

Режада, жумладан, ИШИДга қарши кураш бўйича коалицияга кириши мумкин бўлган «янги ҳамкорлар» кўрсатилиши, шунингдек, ҳамкорларни қўллаб-қувватлаш бўйича чоралар кўзда тутилиши керак.

Бундан ташқари, режада диний ақидапарастликни фош этиш ва террорчиларни молиялаштириш йўлларини йўқ қилиш бўйича чоралар ҳам кўрсатилиши керак.

ИШИД жангарилари ҳозирги вақтда Ироқ ва Суриянинг катта ҳудудларини ўз назорати остида ушлаб турибди.

АҚШ 2014 йилдан бери халқаро коалиция доирасида ИШИДга қарши кураш олиб бормоқда. Коалициядан ўнлаб мамлакатлар, хусусан, АҚШнинг НАТО бўйича ҳамкорлари ва араб мамлакатлари ўрин олган. АҚШ Ироқ ҳукумати билан ҳамкорлик қилмоқда; Сурия эса коалициянинг унинг ҳудудидаги ҳаракатларини суверенитетнинг бузилиши, деб ҳисоблайди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.