Rossiya prezidenti Vladimir Putin AQSh prezidenti Donald Tramp bilan suhbatlashdi, deb yozadi TJournal. Ularning telefon orqali muloqoti Amerika yetakchisi inauguratsiyasidan keyingi birinchisi, uning saylanganidan keyingi ikkinchisi bo‘ldi. Suhbat taxminan 45 daqiqa davom etdi.
Tramp Putin bilan gaplashayotgan vaqtda uning yonida vitse-prezident Mayk Pens, prezident maslahatchilari Maykl Flinn va Stiven Bennon hamda Oq uy apparati boshlig‘i Rayns Pribas bor edi.
Rossiya prezidenti matbuot xizmati ma’lum qilishicha, suhbat “ijobiy va ishbilarmonlik ruhida” o‘tdi. Putin va Tramp terrorizmga qarshi kurash, Yaqin Sharq, arab-isroil ziddiyati, Eronning yadro dasturi va Ukrainadagi vaziyatni muhokama qildi. Kreml ma’lumotlariga ko‘ra, davlat rahbarlari IShID va Suriyadagi boshqa terrorchilik guruhlarini tor-mor qilish uchun harakatlarni muvofiqlashtirishni yoqlab chiqdi.
Rossiya prezidenti matbuot kotibi Dmitriy Peskov so‘zlariga ko‘ra, Rossiya tomonidan Tramp bilan suhbatga Putinning yordamchilaridan hech kim jalb etilmagan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)