Termiz shahridagi Yoshlar markazi binosida 27-yanvar kuni Xalq deputatlari Surxondaryo viloyati davlat hokimiyati vakillik organlari deputatlarining bo‘shab qolgan o‘ringa Oliy Majlis Senati a’zosi saylovi bo‘yicha qo‘shma majlisi bo‘lib o‘tdi, deya xabar bermoqda Markaziy saylov komissiyasi.
“Yashirin ovoz berish yo‘li bilan o‘tkazilgan saylov natijalariga ko‘ra, Surxondaryo viloyati hokimi, Xalq deputatlari Surxondaryo viloyati Kengashi raisi Erkinjon Turdimov O‘zbekiston Oliy Majlisi Senati a’zosi etib saylandi”, — deyiladi rasmiy axborotda.
Eslatib o‘tamiz, 17-yanvar kuni Markaziy saylov komissiyasi tomonidan Erkinjon Turdimovning senatorlik vakolati muddatidan ilgari tugatilgan edi. Bunga Erkinjon Turdimovning “xalq deputatlari Navoiy viloyati Kengashi deputati vakolati tugatilganligi” sabab qilib ko‘rsatilgan edi.
Xuddi shu kuni, “xalq deputatlari Surxondaryo viloyati Kengashi deputati vakolati tugatilganligi munosabati bilan”, Surxondaryodan saylangan Baxtiyor Begimqulovning senatorlik vakolati muddatidan avval tugatilgan va Senatda Surxondaryoning bitta senatorlik o‘rni bo‘shab qolgan edi.
Ma’lumot uchun, Erkinjon Turdimov 2016-yilning 16-dekabr kuni Surxondaryo viloyati hokimi etib tasdiqlangan. Bungacha u 2008-yildan beri Navoiy viloyatiga hokimlik qilib kelayotgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)