O‘zbekiston Prezidenti Shavkat Mirziyoyev Xorazm viloyatiga tashrifi doirasida 28-yanvar, shanba kuni hududda bunyod etilayotgan yangi farmatsevtika korxonasi loyihasining amalga oshirilishi bilan tanishdi. Bu haqda Uzbekistan Today xabar bermoqda.
Xabar berishlaricha, yangi korxona ishga tushganidan so‘ng, har yili ichki bozorni 3,5—4 million dollarlik eksport o‘rnini bosuvchi mahsulot bilan ta’minlaydi, yana 3,8 million dollarlik mahsulotni eksport qiladi.
“Imkoniyat Saxovat” mas’uliyati cheklangan jamiyati va “Mem Gilan” xorijiy korxonasi tashabbusi bilan amalga oshirilayotgan loyiha uchun tashabbuskorlarning 4 milliard so‘m miqdoridagi o‘z mablag‘i hamda uskunalar sotib olish uchun Milliy bank taqdim etgan 25 milliard so‘mlik kredit yo‘naltiriladi.
Rejaga ko‘ra, yuqori texnologik zamonaviy uskunalar bilan ta’minlanadigan korxona 2018-yilning ikkinchi choragida foydalanishga topshiriladi. U O‘zbekistondagi eng yirik farmatsevtika korxonalaridan biri bo‘lishi kutilmoqda.
Umumiy hisobida, bu yerda har yili 33 nomdagi 4 million qadoqdan ortiq ampula preparatlari ishlab chiqariladi. Infuzion eritmalar liniyasida esa yiliga 38 nomdagi 12 million qadoqdan ortiq dori vositalari tayyorlanadi.
Tabletika va kapsula preparatlari liniyasida esa har yili 5 million qadoqdan ortiq dori vositalari ishlab chiqariladi — ularning 10 tasi ijtimoiy ahamiyatli dorilar ro‘yxatidan, 45 tasi esa import o‘rnini bosuvchi preparatlar qatoridan o‘rin olgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)