O‘zbekiston Prezidenti Shavkat Mirziyoyev Xorazm viloyatiga tashrifi doirasida 28-yanvar, shanba kuni chiqindilarni qayta ishlash bo‘yicha zavod qurilishi bilan tanishdi. Bu haqda Uzbekistan Today xabar bermoqda.
Xorazm viloyatida bunyod etiladigan chiqindilarni qayta ishlash zavodi — O‘zbekiston bo‘ylab qurilishi kutilayotgan shunday yo‘nalishdagi korxonalardan biridir.
Urganch tumanidagi 15 gektar maydonni egallagan yangi korxona uchun Milliy bank 7 milliard so‘m va 970 ming dollar sarmoya kiritgan. Ishlab chiqarish majmuasi Xitoyning Beston Group Machinery kompaniyasi tomonidan uskunalar bilan ta’minlanadi.
Korxona 2017-yil oxirigacha foydalanishga topshirilishi, unda har yili 900 ming tonnaga yaqin qattiq maishiy chiqindilar qayta ishlanishi kutilmoqda.
Korxona olti turdagi tayyor mahsulotni ishlab chiqaradi. Jumladan, rezina, avtoshinalar, sellofan va plastmassalardan qozonxonalar uchun yonilg‘i, yog‘och qoldiqlaridan esa inshootlarni isitish uchun briketlar tayyorlanadi.
Salqin ichimliklardan qolgan PET-idishlardan to‘qimachilik va qurilish sohasida talabgir bo‘lgan sintepon ishlab chiqarilsa, qurilish chiqindilaridan devor materiali sifatida foydalansa bo‘ladigan bloklar tayyorlanadi.
Korxonada alohida bir liniya makulaturani qayta ishlab, sanoat korxonalari uchun qadoqlash materiali ishlab chiqaradi. Meva-sabzavot qoldiqlari va eskirgan oziq-ovqatlardan esa biogaz va o‘simliklar uchun o‘g‘itlar tayyorlanadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)