Термиз шаҳридаги Ёшлар маркази биносида 27 январь куни Халқ депутатлари Сурхондарё вилояти давлат ҳокимияти вакиллик органлари депутатларининг бўшаб қолган ўринга Олий Мажлис Сенати аъзоси сайлови бўйича қўшма мажлиси бўлиб ўтди, дея хабар бермоқда Марказий сайлов комиссияси.
«Яширин овоз бериш йўли билан ўтказилган сайлов натижаларига кўра, Сурхондарё вилояти ҳокими, Халқ депутатлари Сурхондарё вилояти Кенгаши раиси Эркинжон Турдимов Ўзбекистон Олий Мажлиси Сенати аъзоси этиб сайланди», — дейилади расмий ахборотда.
Эслатиб ўтамиз, 17 январь куни Марказий сайлов комиссияси томонидан Эркинжон Турдимовнинг сенаторлик ваколати муддатидан илгари тугатилган эди. Бунга Эркинжон Турдимовнинг «халқ депутатлари Навоий вилояти Кенгаши депутати ваколати тугатилганлиги» сабаб қилиб кўрсатилган эди.
Худди шу куни, «халқ депутатлари Сурхондарё вилояти Кенгаши депутати ваколати тугатилганлиги муносабати билан», Сурхондарёдан сайланган Бахтиёр Бегимқуловнинг сенаторлик ваколати муддатидан аввал тугатилган ва Сенатда Сурхондарёнинг битта сенаторлик ўрни бўшаб қолган эди.
Маълумот учун, Эркинжон Турдимов 2016 йилнинг 16 декабрь куни Сурхондарё вилояти ҳокими этиб тасдиқланган. Бунгача у 2008 йилдан бери Навоий вилоятига ҳокимлик қилиб келаётган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)