Tramp Suriyada IShIDga qarshi kurashda artilleriya va vertolyotlardan foydalanishga ruxsat berishi mumkin

Oq uy ma’muriyati Pentagonga qaratilgan prezident ko‘rsatmasi loyihasini tayyorlamoqda. The New York Times ma’lumotlariga ko‘ra, ko‘rsatmada Suriyada IShIDga qarshi kurashni, jumladan, artilleriya va vertolyotlardan foydalangan holda kuchaytirish haqida so‘z boradi.

Gazetaning qayd etishicha, yangi rahbar — Jeyms Mettis qo‘l ostidagi Pentagonning asosiy vazifalaridan biri — IShIDga qarshi kurashni kuchaytirishdir. Xususan, AQSh mintaqadagi maxsus operatsiya kuchlari sonini oshirishi, shuningdek, Suriya va Iroqqa yanada ko‘proq qo‘mondonlarni yuborishi mumkin.

Bundan tashqari, IShIDga qarshi kurashga artilleriya hamda Apache vertolyotlari ham yo‘naltirilishi kutilmoqda.

Avvalroq AQSh prezidenti Donald Trampning ma’muriyati IShIDga qarshi Rossiya bilan birgalikda kurashishga tayyorligini ma’lum qilgan edi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.