Оқ уй маъмурияти Пентагонга қаратилган президент кўрсатмаси лойиҳасини тайёрламоқда. The New York Times маълумотларига кўра, кўрсатмада Сурияда ИШИДга қарши курашни, жумладан, артиллерия ва вертолётлардан фойдаланган ҳолда кучайтириш ҳақида сўз боради.
Газетанинг қайд этишича, янги раҳбар — Жеймс Мэттис қўл остидаги Пентагоннинг асосий вазифаларидан бири — ИШИДга қарши курашни кучайтиришдир. Хусусан, АҚШ минтақадаги махсус операция кучлари сонини ошириши, шунингдек, Сурия ва Ироққа янада кўпроқ қўмондонларни юбориши мумкин.
Бундан ташқари, ИШИДга қарши курашга артиллерия ҳамда Apache вертолётлари ҳам йўналтирилиши кутилмоқда.
Аввалроқ АҚШ президенти Дональд Трампнинг маъмурияти ИШИДга қарши Россия билан биргаликда курашишга тайёрлигини маълум қилган эди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)