Ispaniyaning Barselona shahri ma’muriyati shahar markazidagi sayyohlar oqimini cheklashga qaror qildi. “Gazeta.ru”ning yozishicha, bu boradagi reja shahar turizm siyosati kengashi tomonidan ishlab chiqilgan.
Hujjatga ko‘ra, Barselona shahri hududi to‘rt zonaga bo‘ladi. Birinchi — tarixiy markaz zonasida mehmonxonalar soni qisqartiriladi. Ikkinchi zonada esa mehmonxonalar soni o‘zgarishsiz qoldiriladi.
Ayni vaqtda sayyohlarni joylashtirish uchun ikkita yangi zona tashkil etiladi. Barselona ma’muriyati yangi mehmonxonalarni shahar chekkasida qurishni taklif qilmoqda, markazda esa qurilish taqiqlanadi.
Bundan tashqari, shahar ma’muriyati sayyohlarni joylashtirish uchun olinadigan litsenziyalarni berishni ham taqiqlab qo‘ygan.
Ma’muriyatning ushbu qarori ham shahar aholisi tomonidan, ham sayyohlik tarmog‘i vakillari tomonidan keskin tanqid ostiga olingan.
Ularning fikricha, bu tashabbuslar shahar iqtisodiyotiga, yangi ish o‘rinlarni tashkil etish siyosatiga zarar yetkazadi, investorlarni qo‘rqitib, huquqiy tushunmovchilikni keltirib chiqaradi.
2014-yil ma’lumotlariga ko‘ra, turizm sohasi Barselona hududiy ichki mahsuloti hajmining 12 foizini tashkil etgan.
Ayni vaqtda, The Guardian nashrining yozishicha, 1,6 million kishi istiqomat qiladigan bu shaharga 2016-yil davomida 32 million kishi kelib-ketgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)