Gazli shahrining markaziy ko‘chalariga chiroqlar o‘rnatiladi

Buxoro viloyati hokimi O‘ktam Barnoyev Gazli shahar aholisi bilan uchrashdi, deya xabar bermoqda viloyat hokimligi axborot xizmati.

Xabar berishlaricha, hududning murakkab sharoitini hisobga olgan holda, toza ichimlik suvi bilan ta’minlash, sifatli tibbiy yordam ko‘rsatish kabi bir qator muhim masalalar yuzasidan kechiktirib bo‘lmaydigan ishlarni amalga oshirish talab etilmoqda.

O‘ktam Barnoyev Gazli shahrini yanada rivojlantirish borasidagi dastur doirasida amalga oshiriladigan ishlar to‘g‘risida so‘zlab berdi. Ta’kidlanishicha, shaharda ushbu loyiha bo‘yicha yangi binolar quriladi, bo‘sh turgan obyektlar inventarizatsiyadan o‘tkazilib, tadbirkorlarga beriladi.

Qishloq xo‘jaligini rivojlantirish maqsadida yangi bog‘lar tashkil etiladi, zamonaviy issiqxonalar qurilib, foydalanishga topshiriladi. Parrandachilik, chorvachilik, qoramolchilik rivojlantirilib, yangi ish o‘rinlari yaratiladi.

“Viloyat hokimi shahardagi xizmat ko‘rsatish va servis xizmatini zamon talablariga ko‘tarish bo‘yicha o‘z takliflarini berdi”, — deyiladi hokimlik axborotida.

Yig‘ilishda viloyat hokimi Gazli shahrini obodonlashtirish va ko‘kalamzorlashtirish bo‘yicha dastur qabul qilish zarurligini ta’kidladi.

Bunda shaharning iqlim sharoitidan kelib chiqqan holda qayrag‘och, o‘rik, gilos, qora archa, tuya daraxtlarini ekish, ichki yo‘llarni tartibga solish, markaziy ko‘chalarga chiroqlarni o‘rnatish, yangi loyihalar asosida uy-joy qurish ishlarini jadallashtirish bo‘yicha mutasaddi tashkilot rahbarlariga aniq topshiriqlar berilgan.

Muloqot davomida toza ichimlik suvi muammosi, avtobuslarning qatnovini tartibga solish, ko‘p qavatli uylarning ta’mirtalab ahvolga kelib qolganligi, aloqa tarmog‘ini yaxshilash, ishsizlik muammolari bo‘yicha aholini qiynab kelayotgan ko‘plab savollarga javob topildi.

Qayd etishlaricha, O‘ktam Barnoyev mazkur masalalarni ham tanqidiy jihatdan muhokama etib, ular yechimini ta’minlash bo‘yicha aniq muddat va tegishli topshiriqlar bergan.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.