Бухоро вилояти ҳокими Ўктам Барноев Газли шаҳар аҳолиси билан учрашди, дея хабар бермоқда вилоят ҳокимлиги ахборот хизмати.
Хабар беришларича, ҳудуднинг мураккаб шароитини ҳисобга олган ҳолда, тоза ичимлик суви билан таъминлаш, сифатли тиббий ёрдам кўрсатиш каби бир қатор муҳим масалалар юзасидан кечиктириб бўлмайдиган ишларни амалга ошириш талаб этилмоқда.
Ўктам Барноев Газли шаҳрини янада ривожлантириш борасидаги дастур доирасида амалга ошириладиган ишлар тўғрисида сўзлаб берди. Таъкидланишича, шаҳарда ушбу лойиҳа бўйича янги бинолар қурилади, бўш турган объектлар инвентаризациядан ўтказилиб, тадбиркорларга берилади.
Қишлоқ хўжалигини ривожлантириш мақсадида янги боғлар ташкил этилади, замонавий иссиқхоналар қурилиб, фойдаланишга топширилади. Паррандачилик, чорвачилик, қорамолчилик ривожлантирилиб, янги иш ўринлари яратилади.
«Вилоят ҳокими шаҳардаги хизмат кўрсатиш ва сервис хизматини замон талабларига кўтариш бўйича ўз таклифларини берди», — дейилади ҳокимлик ахборотида.
Йиғилишда вилоят ҳокими Газли шаҳрини ободонлаштириш ва кўкаламзорлаштириш бўйича дастур қабул қилиш зарурлигини таъкидлади.
Бунда шаҳарнинг иқлим шароитидан келиб чиққан ҳолда қайрағоч, ўрик, гилос, қора арча, туя дарахтларини экиш, ички йўлларни тартибга солиш, марказий кўчаларга чироқларни ўрнатиш, янги лойиҳалар асосида уй-жой қуриш ишларини жадаллаштириш бўйича мутасадди ташкилот раҳбарларига аниқ топшириқлар берилган.
Мулоқот давомида тоза ичимлик суви муаммоси, автобусларнинг қатновини тартибга солиш, кўп қаватли уйларнинг таъмирталаб аҳволга келиб қолганлиги, алоқа тармоғини яхшилаш, ишсизлик муаммолари бўйича аҳолини қийнаб келаётган кўплаб саволларга жавоб топилди.
Қайд этишларича, Ўктам Барноев мазкур масалаларни ҳам танқидий жиҳатдан муҳокама этиб, улар ечимини таъминлаш бўйича аниқ муддат ва тегишли топшириқлар берган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)