Afg‘oniston poytaxti Kobul shahrida rasmiy tashrif bilan bo‘lib turgan O‘zbekiston tashqi ishlar vaziri Abdulaziz Kamilov boshchiligidagi hukumat delegatsiyasi 24-yanvar kuni Afg‘oniston prezidentining iqtisodiy masalalar bo‘yicha katta maslahatchisi Humoyun Qayumiy, Markaziy Osiyo mamlakatlari va Rossiya bilan hamkorlikni rivojlantirish bo‘yicha prezident maxsus vakili Muhammad Shokir Korgar bilan uchrashuvlar o‘tkazdi. Bu haqda O‘zbekiston Tashqi ishlar vazirligi matbuot xizmati xabar berdi.
Shuningdek, 23—24-yanvar kunlari Kobul shahrida O‘zbekiston delegatsiyasining sanoat assotsiatsiyalari va xo‘jalik subyektlari vakillaridan iborat a’zolari afg‘onistonlik hamkorlari bilan alohida ikki tomonlama muzokaralar ham o‘tkazdi.
Tashrif doirasida
- qisqa muddat ichida tashqi savdo aylanmasi ko‘rsatkichlarini 1,5 milliard dollarga yetkazish imkonini beradigan ikki tomonlama savdo-iqtisodiy “Yo‘l xaritasi”;
- qo‘shma temir yo‘l va avtomobil yo‘li loyihalarida O‘zbekiston tomoni ishtirokini ko‘zda tutadigan Transport infratuzilmasi sohasida hamkorlikni yanada rivojlantirish maqsadlari to‘g‘risidagi Protokol;
- Xavfsizlik masalalari bo‘yicha Qo‘shma kommissiya tuzish maqsadlari to‘g‘risidagi protokol;
- O‘zaro anglashuv to‘g‘risida vazirliklararo memorandum;
- Narkotik vositalar, psixoterapik moddalar va ularning preskurorlarini noqununiy aylanishiga qarshi kurashda hamkorlik to‘g‘risida ichki ishlar vazirliklari o‘rtasida Bitim imzolandi.
Shuningdek, “O‘zsanoateksport” AJ savdo uyining rasmiy ochilish marosimi bo‘lib o‘tdi. Savdo uyi binosida mamlakatimiz tadbirkorlari mahsulotlarining doimiy faoliyat yuritadigan “O‘zbekistonda ishlab chiqarilgan” ko‘rgazmasini tashkil etish ko‘zda tutilmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)