O‘zbekiston Prezidenti Shavkat Mirziyoyev Toshkentning Bobur ko‘chasida joylashgan va hozirda “O‘zbekyengilsanot” kompaniyasiga tegishli bo‘lgan binoni Respublika baynalmilal madaniyat markaziga topshirish haqida ko‘rsatma berdi. Bu haqda “Novosti Uzbekistana” xabar bermoqda.
“Milliy madaniy markazlarning vakillari nisbatan yaxshi bo‘lmagan sharoitlarda ishlashga majbur bo‘layotganidan shikoyat qilgan edi. Shu munosabat bilan, Bobur ko‘chasidagi binoni Respublika baynalmilal madaniyat markaziga topshirish haqida qaror qabul qilindi. Ta’mirlanib, yondosh hududlar obodonlashtirilganidan so‘ng, milliy madaniy markazlar yangi binoga ko‘chib o‘tishi mumkin”, — dedi Shavkat Mirziyoyev 24-yanvar kuni Respublika Baynalmilal madaniyat markazining 25 yilligi munosabati bilan bo‘lib o‘tgan uchrashuv chog‘ida.
Respublika baynalmilal madaniyat markazi hozirgacha Bobur ko‘chasidagi boshqa bir bino — sobiq Poyabzalchilar san’at saroyi binosida faoliyat olib borayotgan edi. Markazga topshirilishi aytilgan yangi bino esa o‘z vaqtida To‘qimachilar san’at saroyi deb atalgan.
Avvalroq Shavkat Mirziyoyev 24-yanvar kuni “Respublika Baynalmilal madaniyat markazining 25 yilligi munosabati bilan milliy madaniy markazlarning bir guruh faollarini mukofotlash to‘g‘risida”gi farmonni imzolagani haqida xabar berilgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)