O‘zbekistonning barcha fuqarolari, shuningdek, O‘zbekiston fuqarosi bo‘lmagan shaxslar Toshkent shahri va Toshkent viloyatidan xonadon yoki uy sotib olish imkoniga ega bo‘lishi mumkin. Bu “O‘zbekiston Respublikasini yanada rivojlantirish bo‘yicha harakatlar strategiyasi to‘g‘risida”gi O‘zbekiston Prezidentining farmoni loyihasida ko‘zda tutilgan.
Farmon loyihasida O‘zbekiston rezidentlariga Toshkent shahri va viloyatidan qiymati eng kam oylik ish haqining 2 ming baravaridan kam bo‘lmagan, norezidentlarga esa qiymati 100 ming dollardan kam bo‘lmagan yangi qurilgan ko‘chmas mulkni erkin sotib olish va egalik qilish imkonini beruvchi qoidani joriy etish taklif qilingan.
Ayni vaqtda, Toshkent shahri yoki Toshkent viloyatidan yangi qurilgan ko‘chmas mulkni sotib olayotgani uchun rezidentlar va norezidentlar, ko‘chmas mulkning qiymatidan kelib chiqqan holda, 5—10 foiz miqdorda davlat boji to‘lashi ham kerak bo‘ladi.
Farmon loyihasida qayd etilishicha, mazkur o‘zgarishning qabul qilinishi “fuqarolarning xususiy mulk huquqini amalga oshirish kafolatlarini mustahkamlashga, Toshkent shahri va viloyatida uy-joy qurish sohasini jadal rivojlanishiga xizmat qiladi”.
Hozirgi vaqtda Toshkent shahri va Toshkent viloyatidan ko‘chmas mulk sotib olish va egalik qilish uchun bevosita shu hududlar propiskasiga ega bo‘lish lozim. Ayni vaqtda, Toshkent shahrida ro‘yxatdan o‘tgan fuqarolar Toshkent viloyatidan ko‘chmas mulk sotib olishi va egalik qilishi mumkin, biroq Toshkent viloyatida ro‘yxatdan o‘tgan fuqarolar poytaxt shahardan uy ololmaydi.
Ma’lumot uchun, “O‘zbekiston Respublikasini yanada rivojlantirish bo‘yicha harakatlar strategiyasi to‘g‘risida”gi O‘zbekiston Prezidentining Farmoni loyihasi o‘zgartirilishi, to‘ldirilishi yoki rad etilishi mumkin.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)