Pentagon rahbari Jeyms Mettis NATO bosh kotibi Yens Stoltenberg bilan telefon orqali suhbatlashib, Shimoliy Atlantika alyansining AQSh uchun muhimligini ma’lum qildi. Bu haqda Amerika mudofaa vazirligining rasmiy vakili Jeff Devis xabar berdi.
“Ular umumiy qadriyatlarning ahamiyatini muhokama qildi, vazir ushbu qadriyatlarni himoya qilish uchun ittifoqdoshlarni qidirishda AQSh doim Yevropaga murojaat qilishini aytdi”, — dedi Devis. U Mettis va Stoltenberg maslahatlashuvlarni davom ettirishga, shuningdek, NATOga a’zo mamlakatlar mudofaa vazirlarining fevralga belgilangan uchrashuvida muzokaralar o‘tkazishga kelishib olganini qo‘shib qo‘ydi.
20-yanvar kuni AQShning yangi mudofaa vaziri Pentagon xodimlariga yuborgan ilk maktubida Vashingtonning ittifoqdoshlari bilan aloqalarni mustahkamlashini yoqlab chiqqan edi. Uning so‘zlariga ko‘ra, hech qaysi mamlakat do‘stlarisiz o‘z xavfsizligini ta’minlay olmaydi. “Biz Davlat departamenti bilan o‘z alyanslarimizni mustahkamlash ustida ishlaymiz”, — dedi Dengiz piyoda qo‘shinlari korpusining iste’fodagi generali.
Izoh (0)