Finlyandiya o‘z hududida AQSh prezidenti Donald Tramp va Rossiya prezidenti Vladimir Putin ishtirokida Arktika kengashi sammitini o‘tkazishga tayyor. Bu haqda Finlyandiya hukumati rahbari Yuxa Sipilya ma’lum qildi, deya xabar bermoqda “TASS”.
“Agar siyosiy vaziyat yetilsa, biz Arktika sammitini o‘zimizda qabul qilishga tayyormiz. Ko‘p narsa siyosat olamidagi vaziyat va shart-sharoitlarga bog‘liq, ular qanday bo‘lishini hozirdan bilmaymiz. Hozircha Rossiya va AQShdan bu borada hech qanday signal olganimiz yo‘q”, — dedi Finlyandiya hukumati rahbari.
Arktika kengashiga ikki yil muddatga raislik 2017-yil mayida Finlyandiyadan AQShga o‘tadi. Shu munosabat bilan, mamlakatda kengashning oliy darajadagi sammitini o‘tkazish imkoniyati ko‘pdan beri muhokama qilinmoqda.
Dekabrda finlyandiyalik yuqori martabali diplomat Aleksi Xarkonen AQSh va Rossiya yetakchilari 2017-yilning birinchi yarmida Finlyandiyada o‘tkazilishi kutilayotgan Arktika kengashi sammitida o‘zaro uchrashishi mumkinligini aytib o‘tgan edi.
Arktika kengashi 1996-yili Ottava deklaratsiyasiga muvofiq tashkil etilgan bo‘lib, yuqori darajadagi hukumatlararo forum hisoblanadi. U Arktika mintaqasi bo‘yicha hamkorlikka, ayniqsa atrof-muhitni muhofaza qilish masalalariga ko‘mak berish maqsadida tuzilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)