Donald Tramp: Norozilik bildirayotganlar nega ovoz bermadi?

AQSh prezidenti Donald Tramp uning saylangani munosabati bilan Vashington, Nyu-York, Los-Anjeles va jahonning 600 dan ortiq shaharlarida bo‘lib o‘tgan norozilik namoyishlariga munosabat bildirdi.

Trampning so‘zlariga ko‘ra, u norozilik namoyishlari bo‘layotganini ko‘rdi, biroq, uning qayd etishicha, saylovlar o‘tib bo‘lgan. “Nima uchun bu odamlar ovoz bermadi?”, — deya ta’kidladi u.

Tramp “Vashington tomon ayollar marshi”ning minglab ishtirokchilari saylovda ovoz bermadi degan xulosaga qanday qilib kelganiga aniqlik kiritilmagan.

Asosiy norozilik namoyishi bo‘lib o‘tgan Kolumbiya okrugidagi Vashington shahrida Tramp 4 foizga yaqin ovoz olgan; Tramp unga ovoz bergan saylovchilar soni bo‘yicha raqibi Hillari Klintonga taxminan 3 million ovozga yutqazgan, biroq tanlovchilar hay’atining ovozlari bo‘yicha saylovda g‘olib chiqdi.

21-yanvar kuni, Amerika prezidenti inauguratsiyasining ertasiga, AQSh va jahonning ko‘plab yirik shaharlarida umumiy “Vashington tomon ayollar marshi” nomi ostida Donald Trampning saylanganiga bag‘ishlangan norozilik namoyishlari bo‘lib o‘tdi. Namoyishlarning asosiy mavzusi ayollar huquqi uchun kurash va Trampning xotin-qizlar haqidagi qo‘pol fikrlariga salbiy munosabat bildirishdan iborat bo‘ldi.

Aksiya tashkilotchilarining so‘zlariga ko‘ra, norozilik namoyishlarida butun dunyo bo‘ylab 5 millionga yaqin odam qatnashgan. Vashington ma’muriyati tarqatgan axborotga ko‘ra, 21-yanvar kuni shahar transporti bir kun avvalgi — inauguratsiya kunidagiga nisbatan ko‘proq band bo‘lgan, biroq mazkur tadbirlarga tashriflar soni bo‘yicha rasmiy axborot hozircha yo‘q.

Avvalroq Tramp OAVni o‘z inauguratsiyasi tashrifchilari sonini kamaytirib ko‘rsatishda ayblab chiqqan edi. U 22-yanvar kuni Twitter’dagi sahifasi orqali uning inauguratsiyasi teleauditoriyasi Barak Obamaning 2013-yilgi qasamyodi tomoshabinlari sonidan oshib ketganini bildirgan edi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.