Davlatlararo aviatsiya qo‘mitasi (DAQ) ekspertlari Bishkek yaqinidagi yuk Boeing’i halokatini hodisa joyida o‘rganishni yakunladi. Bu haqda aviahalokat sabablarini tekshirish bo‘yicha komissiya raisi, DAQ vakili Leonid Kashirskiy Qirg‘iziston bosh vaziri Sooronbay Jeenbekov bilan uchrashuv chog‘ida ma’lum qildi, deb yozadi “TASS”.
Kashirskiy yaqin orada barcha ma’lumotlar Qirg‘izistonda ommaga taqdim etilishini aytdi. Aviahalokat oqibatlarini bartaraf etish bo‘yicha shtabdagilar aniqlik kiritishicha, DAQ vakillari layner qulagan joyni tekshirishni yakunlagan, ammo “aviahalokat yuz bergan vaziyatni o‘rganish davom etmoqda”.
Gonkong—Bishkek—Istanbul yo‘nalishida parvoz qilayotgan Turkiya kompaniyalaridan biriga tegishli Boeing 16-yanvar kuni Bishkekning Manas aeroportiga qo‘nish vaqtida yaqindagi dala-hovlilar joylashgan qishloqqa quladi. Layner 23 ta bir qavatli turar-joylarni to‘liq buzib tashladi. Qirg‘iziston FVV ma’lumotlariga ko‘ra, hodisa natijasida kamida 35 kishi, shu jumladan, ekipaj a’zolari halok bo‘ldi. Yana kamida 19 kishi Bishkek kasalxonalariga yetkazildi.
Izoh (0)