AQSh elchixonasi Lavrovning diplomatlar Rossiya bo‘ylab safar qilishi haqidagi gaplarini izohladi

Amerikalik diplomatlar o‘z maqomiga ko‘ra Rossiya hududida har qanday odamlar bilan uchrashish va sayohat qilish huquqiga ega. Bu haqda AQShning Rossiyadagi elchixonasi matbuot xizmati rahbari ma’lum qildi, deb yozadi “RIA Novosti”.

Avvalroq Rossiya tashqi ishlar vaziri Sergey Lavrov amerikalik diplomatlar “Kaliningrad, Leningrad, Murmansk, Voronej viloyatlari bo‘ylab yurgani… Novorossiysk, Checheniston Respublikasi, Donbass bilan chegara bo‘ylab, deyarli hamma yerni — ipidan ignasigacha kezib chiqqani”ni va “josuslikdan tashqari, AQSh elchixonasi diplomatlari bizning muxolifat mitinglarida, hukumatga qarshi mitinglarda, ruxsat berilmagan mitinglarda, shu jumladan, qiyofasini o‘zgartirgan holda qatnashayotgani kuzatilgan”ini aytgan edi.

“Biz OAVlarning vazir Lavrovning da’volari haqida yozganlarini ko‘rdik… Umuman, aytishim mumkinki, AQShdagi rossiyalik diplomatlar kabi, amerikalik diplomatlar va rasmiy shaxslar kundalik ish davomida turli odamlar bilan uchrashadi. AQShdagi rossiyalik diplomatlar kabi bizning diplomatlar ham Rossiyadagi vaziyatni to‘liqroq va chuqurroq tushunish uchun standart diplomatik faoliyat doirasida Rossiya Federatsiyasi hududi bo‘ylab sayohat qiladi. AQSh va Rossiya o‘rtasidagi hamkorlik mamlakatlar darajasida va xalqlar darajasida davom etmoqda”, — dedi AQSh elchixonasi matbuot kotibi.