Yaponiya hukumati imperator Akixitoning taxtdan tushganidan so‘ng “daydzyo tenno” yoki qisqacha “dzyoko” maqomini olishi uchun harakat qilmoqda. Bu maqomni shartli ravishda “oromdagi imperator” deb tarjima qilish mumkin. Bu haqda ishonchli manbalarga asoslanib Kyodo axborot agentligi xabar qilgan, deb yozadi “TASS”.
“Dzyoko” maqomi imperatorlarning taxtdan tushishi tez-tez sodir bo‘lgan feodalizm davrida keng qo‘llanilgan. Hozirda ushbu atamaning 83 yoshli imperator Akixitoning taxtdan ketishi bilan bog‘liq bo‘lgan barcha jarayonlar va shart-sharoitlarni tartibga solishga qaratilgan maxsus qonunga kiritilishi mo‘ljallanmoqda. U faqat hozirgi imperatorga nisbatan qo‘llaniladi.
“Dzyoko” maqomining ishlatilishi bir qator ekspertlarning xavotiriga sabab bo‘lmoqda. O‘rta asrlardagi tartiblarga asosan, taxtdan tushayotgan imperator ma’lum siyosiy hokimiyatni o‘zida saqlab qolgan. Yaponiya hukumati bu hodisani qat’iy chetlab o‘tishni xohlamoqda va bu yangi qonunda ham o‘z aksini topishi kerak.
Akixito 2016-yil avgust oyining boshida o‘zining telemurojaati orqali keksa yoshdaligi sababli taxtdan ketmoqchi ekanligini bildirgan edi. Ijtimoiy so‘rovlarning natijalariga ko‘ra, uning maqsadini Yaponiya aholisining katta qismi qo‘llab-quvvatlamoqda. Hozirgi vaqtda vazirlar mahkamasi qoshida hozirgi qonunchilikda ko‘zda tutilmagan imperatorning oldinda turgan taxtdan ketishining barcha jihatlarini o‘rganib chiquvchi ekspertlar kengashi ishlamoqda. OAVlar 56 yoshli valiahd shahzoda Naruxitoning otasi taxtdan ketganidan so‘ng taxtga o‘tirishi amalda hal bo‘lgan, deb hisoblamoqda. Yangi imperator 2019-yil 1-yanvarda taxtga o‘tirishi kutilmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)